壹傳媒飯堂於前日換新canteen，華星冰室同鏞記燒鵝各據一方，前華星唱片高層文滌有份開設嘅華星冰室，近年旗下藝人EO2隊員Eddie、蔚雨芯（Rainky）、裕美都加入做股東，今日三位股東殺入壹傳媒canteen，向員工免費派發1,000個印有「壹」字月餅及300個杯，大受歡迎。

問到點解嚟壹傳媒開canteen？Eddie表示：「都要多謝番壹傳媒，最初《飲食男女》同事聯絡我，問有冇興趣嚟做canteen？之後我同partner入嚟同黎生（黎智英）傾，佢要求好簡單，想畀好嘢員工食，佢話好多同事嚟過華星冰室，覺得啲嘢好食嘅，所以邀請我哋入嚟做。而價錢同出面舖頭唔同，壹傳媒平啲，我哋都好想同大家講聲，我哋係冇將價就貨，你哋老闆對待員工好好，佢有補貼，所以價錢先可以調低，我哋用嘅貨品全部同所有店舖一樣。」

裕美除幫手派月餅，仲收集壹傳媒員工意見：「始終新開張，睇下大家對食物有乜意見，希望做到更好，有一個好正，佢話：『多謝你哋從地獄救番我哋出嚟！』好誇張。」記者謂壹傳媒員工對食物質素要求好高，之前幾間canteen都被叮走，三人異口同聲話：「我哋唔擔心，對自己出品好有信心，加上同記者朋友都熟。」記者笑言：「我哋冇面畀！」Eddie話：「其實我哋唔需要畀面，就係因為熟可以畀真意見，令我哋不斷改進可以keep好，初頭梗係乜都好，最緊要諗點樣維持。」Rainky笑說：「記者朋友仲犀利過食環處，所以我哋要加倍努力。」

Rainky就推介校長譚詠麟自創嘅「校長多士」：「6年前我親眼睇住校長喺筲箕灣華星冰室，問伙計攞黑松露同多士拎去焗爐整。」被封為「魔鬼胸」嘅Rainky，指住枱上嘅「魔鬼豬扒包」：「其實我一直有個問題，但唔敢問，我前面有個『魔鬼豬扒包』，可唔可以唔係豬扒呢？你哋明唔明呀，真係激死我呀！」裕美笑着安慰：「呢個係最好食嘅豬扒包，啲人食完會回味無窮。」令到Rainky哈哈笑：「Thank you.」

精選娛聞，喺晒《娛果》
http://fb.com/appledailyent