民主黨嘅真兄弟事件，相信都會隨住黨中央公布咗調查報告而落幕；𠵱家大家嘅火頭，梗係擺喺年底換屆選舉，睇睇班少壯派同主流派會唔會互片、新領導班子下嘅民主黨何去何從。
當然，何俊仁就最有「後福」，事關佢已經被視為接高達做主席嘅不二之選。仁哥今日會孖住狄志遠同單仲偕開記者會，正式宣布組閣參選。仁哥噚日喺一個電台節目否認今次被視為主席大熱係「欽點」，仲話佢都唔算黨入面同中央好關係嘅人，因為試過太多次，啲中方官員同其他人握完手後，就會運路走扮見唔到佢同成班民主黨員，咁又點算關係好？
仁哥仲自爆12月1日生日當天，已經應承出席改革派主辦嘅研討會，探討個黨可以點改善。嘩，連生日呢啲咁矜貴嘅日子都要送畀黨員，真係抵畀仁哥做主席嘅。