失婚嘅吳啟華寄情工作，早前拍完鄧特希新劇《隱世者們》，今日去咗澳門新濠影匯賭錢，被本報讀者朱先生捕獲，並透過「爆相爆片」透露：「1點半左右，見到吳啟華喺度賭百家樂，每鋪二千蚊上落，有贏有輸，個樣愁晒。」

記者致電吳啟華了解，佢承認：「係呀，啱啱拍完戲同朋友嚟玩吓。」問到係咪輸錢？佢笑言：「輸唔緊要，賭錢嘅嘢玩吓啫，有贏有輸有和，幾多錢唔好講啦，唔會影響生活質素。成年人，總之唔好出事控制唔住，小賭怡情。」

啟華仲將踩單車相俾記者話：「去澳門唔係只去賭場，都可以有健康活動，唔好只係登我去賭場賭錢又話我爛賭啦，度假玩吓就係咁簡單，跟住仲會去沖繩、澳洲、歐洲踩單車自駕遊。」