當全世界準備喺呢幾日迎接費基亞正式過檔利物浦嘅消息，上周六突然嚟個反高潮，里昂發聲明話同紅軍嘅談判已經終止，呢位家陣正備戰世盃嘅法國國腳，來季會繼續留隊，我求大俠睇完呢單新聞後，同紅軍球迷一樣O晒嘴。

膝部舊患有斟酌

近日報道一直話，利物浦將會用5,300萬鎊轉會費買入費基亞，仲已經派人去法國大軍訓練營幫佢體測，連唔多關事嘅法國足總主席利加列（Noel Le Graet）都走出嚟叫好，其間喺網上仲懷疑已洩漏費基亞着上利記波衫、成功加盟嘅官方宣傳片，仲傳話已同費基亞就個人加盟條件都已經傾掂埋，雙方會簽約五年，點知里昂上周六突然發出官方聲明：「同利物浦就費基亞轉會嘅談判未能成功，里昂喺今晚決定終止談判。」真係一盆冷水淋熄咗紅軍球迷啲興奮心情。
到底點解紅軍會臨尾撻Q呢？據英媒話紅軍因為喺體測時發現三年前曾經因為嚴重膝傷長唞嘅費基亞，膝頭哥仍然有問題，覺得可以就呢件事同里昂再傾吓轉會費，嘗試壓價，就係因為咁樣觸怒咗里昂，認為紅軍方面欠缺誠意，決定叫停。或者紅軍都知今次談判破裂，好大程度係自己衰孤寒，亦冇就事件發官方聲明或作出任何評論，但你話如果紅軍再提高個價，里昂係咪唔會回心轉意又未必，但一切睇嚟都要等世盃之後，先可能重新再談判。

高帥或轉簽葛斯

紅軍想簽費基亞，其實就係想佢填補菲臘比古天奴一月離隊後嘅空缺，因為兩個人位置同角色都幾相似，而且球季咁長，可以同「埃及文明」嘅穆罕默德沙拿、羅拔圖法明奴同沙迪奧文尼輪流上陣，增加領隊高路普排陣嘅彈性。不過，就算簽唔到費基亞，紅軍都唔係冇其他人選，其中高路普執教多蒙特時嘅舊部馬里奧葛斯，最近喺一段紀錄片中就話好想同高路普再合作。退而求其次嘅話，葛斯都係唔錯嘅選擇，同埋紅軍已經率先引入咗法賓奴泰華利斯同拿比基達，人腳比起上季點都增強咗，球迷又真係唔使太擔心嘅！

Now TV每日只需$6*，
全年睇盡猛片，新劇，世界盃
即刻撳下面登記優惠或致電2888 1888(後按2)申請啦！
https://bit.ly/2JqDJKw
*優惠期有限，受條款及條件約束。