林峯噚晚喺紅館舉行演唱會，卻不幸發生流血事件，佢唱完《Broken》後左手姆指就出現傷口流血，林峯傷「指公」後，佢一直忍住唱到完騷，果然專業。峯峯手指受傷，真係有苦自己知，所以同粉絲握手環節，佢猛叫：「唔好咁大力，有傷口。」
完騷後林峯接受訪問時話：「唱完《Broken》，可能我手指摸到身上飾物割傷。」佢展示傷口時，未有包膠布，傷口流血都結焦，傷口長約5cm，幸好只係皮外傷，未算嚴重。林峯仲話：「我擔心滴血會跣到dancer，𠵱家冇乜大礙。」