喺陳志雲上訴得直當日，話支持佢嘅人都係天使（新聞連結： http://bit.ly/2mZ8oTo ），志雲解釋呢個「天使」嘅由來：「英文講就係『you are all angels』，都係上帝派嚟嘅天使，對我嚟講好恰當。」咁如果支持嘅人就係天使，咁係咪志雲暗示身邊有人係魔鬼？

志雲話：「No no no，我唔會隨便叫人魔鬼㗎！我冇去留意邊啲係魔鬼，剩係留意天使，因為魔鬼係好難睇到出嚟。」王喜補充：「因為魔鬼在細節吖嘛，好難發現，天使因為有翼，又係白色，咁所以易啲見，咪顯眼啲囉！」志雲再話：「你問我，我真係唔覺得邊個係魔鬼，因為其實真係要好高道行，魔鬼係變壞咗嘅天使，如果佢做得魔鬼，即係佢曾經係天使，你可以某程度上……如果我話你係一個魔鬼，我可能唔係貶緊你，係褒緊你。」

既然志雲形容過王喜係天使，咁王喜覺得對方係咩呢？王喜話：「佢係我嘅菩薩，好多人嘅菩薩。」王喜形容志雲鍾意幫人，有時會開聲，話邊個邊個台要人，好鍾意幫人搭路，叫人「你去試吓啦」呢啲舉動，王喜覺得志雲係畀到希望人。

王喜又讚志雲：「佢好叻開解人，喺大家身處困局嘅時候，大家都會話：『幾好呀，有個希望。』佢畀人帶住希望返屋企。」志雲就謙虛解釋：「都唔係一定畀到機會人。」王喜就好有信心答：「咪就係你做到。」

至於兩人由上司變朋友，認識到對方係咪無憾？志雲話：「其實我從來冇當過係佢上司，冇覺得係任何人上司，大家係拍檔喺唔同崗位。」佢以地盤工人同設計師做比喻，所有人只係崗位唔同：「我唔覺得佢哋應該高級或者低級工人。」

志雲再話：「我同王喜唔係上司下屬，上司下屬只係範疇唔同，有呢個朋友梗係高興、感恩，唔好講話你對對方有冇付出，就算你付出好多，都唔代表人哋要咁對你。唯一會無條件付出，係父母，但儘管係父母，有時都會唔理解，所以有個冇血緣關係、大家關心，支持自己嘅人，梗係開心啦。你同意呵？」王喜笑住答：「梗係同意啦，你咁正經。」

化妝：Tiffany Tong
髮型：Michael Lam of Beijing Hair Culture
場地：唐人館