每年暑期馬會都會招募見習學員，Jerry周俊樂就喺2015年成功投考，去年被派往澳洲受訓。

見習騎師一般喺外地要習騎兩三年，先可以返港出賽，但因為勞景暘被撤銷牌照，所以Jerry當時被急召返港上陣。

不過Jerry年紀輕輕，能夠咁快被召回，除咗係機緣巧合，本身都要有番咁上下料子。

現年廿歲嘅周俊樂，喺2015年9月加入馬會賽事見習學員培訓計劃，其後喺2019年1月前往南澳洲阿德萊德接受海外訓練。

周俊樂喺阿德萊德期間，跟隨前領練馬師麥理昂（Leon Macdonald）學藝。佢喺2019年3月20日首次出賽，累積喺當地上陣544次，贏過77Win，勝出率高達14.2%，仲排喺當地騎師榜第五位添。

佢係今年3月14日，仲有一場好耍家嘅賽事，話說當時佢騎Always The King起步漏閘，但臨危不亂，重新操控好匹馬後上反勝，贏盡當地傳媒掌聲，極具大將之風。

其後佢返嚟香港首次上陣，就已經成功憑「承你所願」及「二郎」起孖，可謂一炮而紅；埋單計騎咗兩個月贏咗七Win，成績算標青啦。

提到香港同外地騎馬嘅分別，佢表示：「喺外地騎馬，同場唔會有咁多隻馬一齊跑，但喺香港幾乎場場都出滿14匹，競爭性大好多，一開始都會覺得有少少唔慣。」

不過幾困難都要適應，Jerry說：「每次跑完馬，我師傅韋達同導師高雅志，都會好有耐性咁同我睇片，睇吓有邊啲細節位可以做得更好，再慢慢針對下苦功。」

展望下季，佢仍然仲有大把進步空間，加上又係現時唯一的十磅仔，絕對不愁寂寞，就睇吓新季可唔可以挑戰吓師兄何澤堯，有份爭吓告東尼獎啦。