(新增回應)

今年27歲嘅前港姐季軍劉佩玥(Moon)，去年同鍾嘉欣前男友伍允龍合作《城寨英雄》而撻着，但今日有周刊報道話，近日到大陸拍劇嘅伍允龍，同Moon少咗聯絡，而Moon唯有搵好姊妹陳瀅佢哋做伴，就係咁，開始同「巨聲幫」周志文混熟，喺周志文狂攻下，Moon亦動心，決心同伍允龍分手，投向周志文嘅懷抱。

情路一直麻麻嘅Moon，早年就曾同賭王之子何猷亨傳過緋聞，但原來猷亨當時係情歸劉佩玥兄嘅好姊妹陳瀅( 新聞連結： http://bit.ly/1OjT4bc )。去年Moon同伍允龍合作《城寨英雄》時，呢對螢幕情侶，觀眾受落之餘，佢哋亦戲假情真，正式撻着，雖然佢哋就冇公開認過拍拖，但就經常結伴出席朋友聚會，露出端倪。

但今日有周刊就報道話，今年三月開始，伍允龍就返咗大陸拍劇，同Moon就開始少咗聯絡，咁Moon閒時就會搵陳瀅同一直相熟嘅「巨聲幫」周志文一齊玩，而Moon同周志文都鍾意唱歌，近月佢哋就不時喺社交網玩唱歌直播，更不避嫌咁打情罵俏。報道仲話佢哋4月仲約埋一齊去上海旅行㖭，但為咗保護呢段戀情，陳瀅就好有義氣咁做電燈膽，幫佢哋做擋箭牌。本月初，仲有傳媒影到佢哋去淺水灣拍拖，當然老友陳瀅都有同行做擋箭牌啦！

對於同伍允龍分手，秘撻周志文一事，Moon回應周刊時就話冇拍拖，仲話自己好Lonely，話感情有進展喎！仲話同周志文識咗好耐，係好朋友，Moon話佢哋有一班朋友好俾心機去做live，分享佢哋嘅友情，除此之外就冇特別。至於係咪因為伍允龍閃蛋而分手，劉佩玥再澄清佢哋只係螢幕情侶咋！

而周刊亦有問周志文，佢亦同Moon都夾咗口供，話佢哋不嬲都係好朋友，識咗4年，仲解釋話可能近排佢哋多咗上網做Live，大家先有錯覺。而身在大陸嘅伍允龍就過經理人回覆周刊，直認同Moon少咗聯絡，作為朋友會替佢開心。

究竟劉佩玥同周志文係咪拍拖？劉佩玥今日回覆傳媒時話﹕「佢現在事業為重，努力工作，感情狀況不急切亦不抗拒，但現在很享受單身的生活，感謝大家關心。」而周志文亦稱自己係單身，問到有冇追求劉佩玥？佢大耍太極話﹕「現狀況都幾好，開心好多朋友，單身好處係多啲時間做自己嘅事同陪屋企人。」