港交所（388）前主席夏佳理並非「梁粉」，梁振英上場後，佢冇乜公職在身，今年初退埋港交所董事後，政商界鮮見佢蹤影。但佢老友電盈（008）主席李澤楷旋即睇準時機，邀夏佳理閃電「出山」，噚日宣佈委任夏佳理做富衛主席，為呢間收購冇耐嘅保險公司打響名堂。
小小超與夏佳理一向關係良好，小小超亦係夏佳理旗下律師行大客。舉例，08年就係由夏佳理嘅律師行，代表小小超前女友梁洛施與英皇就合約事宜對簿公堂。09年電盈私有化上訴聆訊，亦係由夏佳理嘅律師行代表電盈大股東盈科拓展。
小小超今年初完成收購ING香港、澳門同泰國保險業務，改名富衛，打算大搞，搵呢位喺政商界都有份量嘅老友坐鎮唔出奇。
夏佳理噚日首度以富衛主席身份會見傳媒，不諱言「同Richard（李澤楷）熟」，對方提出邀請，佢考慮幾個月，覺得小小超嘅保險團隊非常有經驗，亞洲保險市場亦有得做，於是決定幫手。

「唔會盲目叫佢簽支票」

佢承認「雖然保險我就唔係好資深，但係我喺監管同風險管理方面就可以貢獻」。咁又係喎，夏佳理本身係律師，又做咗港交所主席六年，監管最在行。難怪佢自信滿滿咁話，以後可以跟小小超雙劍合壁，佢睇住監管、風險，對方專心做生意。
最近保險巿場有好多併購活動，佢話會留意巿場有冇合適目標，如果冇，就寧願唔買，專心發展現有業務，「唔會盲目叫佢（Richard）簽支票嘅！」

李華華
mailto:[email protected]