成也失業率，敗也失業率！一次低過預期，即時扭轉整個行情走勢，伯南克話冇靈丹妙藥，新末日博士魯賓尼繼續發功踩多兩腳，連獅子銀行大班紀勤都話，未來幾個月市場會出現新一輪調整，好有可能係銀行有新一輪集資壓力。
無獨有偶，滙控（005）都趁好價賣咗美國紐約總部大樓。記得上次獅王賣樓係英國倫敦總部，07年以10.9億英鎊賣畀西班牙基金，及後基金爆煲，勁蝕2.5億鎊將大樓原璧歸趙。如今賣美國物業套近26億元，仲打算再放售英國總部，為提升資金水平好，擔心樓價再跌都好，此舉反映明日世界不一定好。最近有搭過飛機的朋友可能唔同意，因為好多班機喺剛過去的黃金周旺季都高朋滿座，經濟復蘇仲點會有花假？

載客量改善只因基數低

冇錯，航機坐滿係事實，國泰（293）上星期載客量為今年以來最好，但管理層未敢樂觀，話要睇到年尾先知撇除季節性因素後，業務是否真係明顯改善。講得咁保守唔係要玩神秘，等業績出時畀市場一個驚喜，而係全球航運業的確仍未擺脫困境。
睇番國際航空協會（IATA）最新數字，8月全球載客量按年跌1.1%、貨運則跌9.6%，兩者較7月份雖有明顯改善，但唔好忘記，去年8月正係金融海嘯前夕，數字改善只係基數低效應作怪，載客率升越80%亦只係縮減航班所致，否則商務同經濟客位平均票價唔會按年減22%及18%咁多。
論客量，中東航線是全球唯一錄得增長的地區，客運需求比去年升10.8%，亞洲雖有改善，但未擺脫跌勢。貨運方面除咗中東有增長外，拉丁美洲亦升3.9%，惟獨亞洲及歐美仍跌9至14.5%。雖然協會預測明年客貨運分別可以回復4%及5.5%增長，但需求增長唔代表航空公司盈利提高，因為航油成本上升、航班減少，令毛利空間越來越窄，協會預計今年全球業界損失高達110億美元。
技術上，航空股同電訊股一樣係弱勢中的弱勢板塊，睇怕要等下一輪炒經濟復蘇先再有生氣，不如睇吓港機工程（044），因為飛機點都要維修，加上有3厘股息袋袋平安，係悶市中基金經理愛股。
胡孟青