世界盃係四年一度體壇成事，除咗普羅大眾外，唔少藝人﹑名人及女神等，都會抽時間睇波，除咗本身熱愛睇波外，如果唔睇驚冇話題嘛﹗

而賭王何鴻燊四太梁安琪嘅囝囝何猷君，呢排都經常睇波，不過佢就唔係喺香港睇，所以冇遇到蔡卓妍及李雨陽鬧爆TVB嘅問題，猷君今日喺微博表示：「自己一個在美國躲在家看葡萄牙加時追平！叫到喉嚨沙！要快換掉球衣，要不是上不了街吃飯哈哈。」

另外，台灣宅男女神陳妍希原來都係球迷喎，佢噚日先喺微博問咗大家一個問題：「我最近是一句成語的代言人，跟球有關！猜中有獎！」

過咗一陣妍希BB見冇咩人估到，佢就畀咗個題示大家：「好吧！都沒人猜對，給點提示。有數字！我是明燈！」

到咗今日妍希BB揭曉答案，佢話：「有人答對了！十賭九輸。我和家人賭世界杯（盃），賭了十場，輸九場。」睇嚟妍希BB都應該估錯咗好幾場喎，原來佢做咗「台版燈神」，同大埔LuLu董嘉儀有得揮喎﹗