28歲的羅仲謙跟33歲的楊怡前日凌晨同車返家，楊怡被本報記者發現在羅仲謙駕車途中伏在他要害上，昨日二人分別在經理人陪同下，在將軍澳電視廣播城跟記者見面，會上楊怡主力發言，她否認跟羅仲謙拍拖，只承認雙方在觀察中，她解釋當時因為飲醉酒，所以伏在羅仲謙大髀上，她說：「對於自己信任嘅人嚟講，我瞓喺佢大髀度，覺得絕對係毋庸置疑。」

羅仲謙與楊怡前日凌晨同車返楊怡將軍澳家，在40分鐘車程中，楊怡的頭都不見了，其後記者在燈位發現，楊怡伏在羅仲謙的要害上。二人昨日在雙方的經理人李小姐、樂易玲和曾醒明陪同下，在將軍澳電視廣播城的傳媒中心見記者，席間以楊怡最主動發言，她率先開腔說：「其實嗰日（大前晚）係第13期訓練班搞聚會，有啲人已經離開咗TVB，我自己本身好少出去飲宴應酬，但係嗰日太開心，飲多咗酒，我食飯之前已經同羅仲謙講，叫佢嚟車我，因為法律係飲咗酒唔可以揸車，所以咪搵咗個信任嘅人送我返屋企。」

聲稱嘔落碗麪度

羅仲謙表示當晚食店外有疑似記者的人出現，楊怡補充說：「我本身性格唔係一個鍾意出風頭、鍾意食飯俾人跟、行街俾人影嘅人，所以我選擇咗同張美妮、趙永洪同埋一個訓練班嘅同學仔，一齊搭的士去美妮屋企落車，羅仲謙先至再pick up番我上車，但係我喺的士度已經嘔同斷晒片，落的士已經嘔晒喺地下同暈，我喺嗰陣時間已經斷咗片，作為一個藝人，喺飲醉嘅過程係冇人想俾人睇到，而且對於自己信任嘅人嚟講，我瞓喺佢大髀度，覺得絕對係毋庸置疑，我覺得有必要講番，喺嗰一剎那點解大家會睇到嗰啲相，係因為去到我屋企閘口嘅時候，羅仲謙同我講：『阿怡醒喇，有狗呀』一個藝人對於有記者呢啲咁敏感嘅字眼，第一時間惟有遮住塊面、戴番頂帽，不過飲醉嘅人瞓低好哋哋，一起身即刻想嘔，咪攞起碗佢原本買畀自己食嗰碗麪度，打開個蓋喺裏面係咁嘔，嘔完之後嘴濕濕。呢樣咪係我想澄清番嘅嘢，當然中間斷片嘅嘢，咪交番畀佢去講。」

羅仲謙悔冇制止

接着羅仲謙說：「我知佢會去聚會同飲酒，咪預早少少去等佢，等佢嗰陣懷疑有記者，咪去咗美妮屋企上車，佢一上車已經暈暈哋，伏咗喺我大髀度，我責任係送佢返屋企，揸得好安全好慢，亦都冇扶開佢，我怕佢會嘔同好辛苦。返屋企途中，我發覺好似有記者喺後面，其實去到嗰個位置，記者可能察覺我知道，所以咪閘車落嚟影，我咪同阿怡講有記者，佢咪戴番頂帽坐起身，我亦見住佢一起身就嘔，好似佢咁講嘔落一碗等佢嗰陣買畀自己食嘅麪度。」楊怡承認有為事件喊過。羅仲謙承認車程中沒有為楊怡扣上安全帶，他說：「我唔應該俾佢長期伏喺我度，應該幫佢扣安全帶，或者我應該擺佢喺後座。」
楊怡表示藝人都是人，不會在公眾地方做出這種行為，她表示不擔心照片流出，亦不介意將照片公開。楊怡被問到羅仲謙是最信任的人，但她依然否認兩人拍拖，更否認同居，楊怡說：「我哋家係處於互相了解同順其自然嘅方向裏面，影到出入又或者同一架車點可以話係同居。」羅仲謙亦以隨緣來形容雙方發展機會，他說：「感情隨緣喇，我對阿怡將來係正面咁培養感情，家的確喺了解中。」
採訪：何慧斯、楊潔雯
攝影：黃偉雄