好耐冇喺呢個欄目同大家畀貼士，所謂唔熟唔食，今次推介都係來自我素有研究嘅德甲同埋英超，冷敲哈化柏林3:3打和來訪嘅慕遜加柏，同埋車路士主場贏韋根4:2。
車路士早排表現麻麻，但換咗由軒迪克領軍後，啲信心狀態乜到返晒嚟，之後仲連贏阿士東維拉同埋祖雲達斯，所以我都撐牽牛要車路士[-1]「主勝」。之但係，牽牛要2:0細波膽，我就揀咗4:2大波膽，無他嘅，車路士嘅防守唔算好，而且近6次對韋根3次有失波，所以韋根要打破入球荒，兼且喺佢哋身上入到一、兩球，真係唔係冇可能，4:2有成50倍，20蚊買落去收番一千，抵過買六合彩。

哈化3:3可串

同日仲有德甲，其中哈化柏林主場對慕遜加柏，博大霧要3:3。哈化嘅攻力不嬲唔得，但今季喺利物浦借咗禾路連返嚟後，入球能力強咗；而慕遜加柏歇冬後喺進攻方面有改善，上場仲贏漢諾威3:2，而佢哋中前場有鮑祖漢、馬高馬連、紐維利及米高巴特利等好手，的確有權攻破哈化嘅大門；另外，睇番往績，佢哋兩隊對親都多入波，就博一博要個3:3。而法蘭克福主場對史浩克04，對上4次碰頭後者贏3次，當中有兩次是贏1:0，值追。
至於愛斯賓奴上場爆大冷作客贏巴塞，今返主場對連勝斷纜嘅皇馬，博佢哋再偷到雞要[主/和]，賠率有成16倍。
文：青蛙仔