被視為科幻神劇的《黑鏡》第四季啱啱開播,劇集一向以科技禍害作主題,共6集以獨立故事方式呈現。除咗茱迪科士打(Jodie Foster)執導嘅《天使方舟》(Arkangel),另外值得講嘅絕對係超現實作《星艦卡李斯特號》(U.S.S. Callister),呢個單元可謂夠晒騎呢古怪,睇完真係有種唔知佢想點嘅感覺。故事講述電子遊戲公司創辦人現實中毒到不行,日日被同事歧視成肚氣,於是放工就沉迷電子世界,偷取身邊同事DNA將佢複製成遊戲中嘅扯線公仔,日日逼佢哋扮太空冒險隊成員,自己就做艦長Captain Daley。最慘係成班同事要無止境咁陪佢癲,否則就會被極刑懲罰。最後故事中嘅女主角hack到出外面世界,叫真實嘅佢救自己,但過程相當兒戲,最後成班人又無啦啦因為搵到程式更新嘅漏洞,衝出「蟲洞」成為真正遊戲一部分。簡單嚟講除咗主角複製同事呢部分夠變態之外,成集都好多難以現解嘅漏洞,令人失望。