iOS遙距拍片兼收音 攝聽Phone魂
呢部坦克外形真係攞滿分,恍如一架上月球嘅探測車。除咗可以作基本的前後左右移動外,最大賣點就係可以監視兼偷聽。車頭設置的鏡頭可於行車時即時傳送影像至iPhone。平時玩遙控車,多數用眼望住架車,但玩呢架「間諜坦克」就可以以第一身視點操控,即使車身離開視線範圍仍可控制自如,加上即時傳聲,感覺就好似坐在車中一樣。而更強嘅係鏡頭設夜視功能,喺較暗嘅環境一樣睇得清清楚楚,玩落更有軍事Feel。
實玩測試,影像傳送非常流暢清晰,更可拍攝硬照,相片即時存入iPhone,雖然相片質素一般,但勝在好玩方便!美中不足之處係唔可以拍攝短片,亦未能遙控調校鏡頭角度,否則呢部「間諜坦克」的可玩度一定更大!另外,收音方面,雖少不免有些雜音,但聽人說話亦尚算清晰,用嚟偷聽八卦秘密都夠晒用。
「間諜坦克」以WiFi直接連接iPhone,並不需要另加額外訊號發射器。只要利用i系機,包括iPodTouch、iPhone或iPad單撈專用App,接上坦克的WiFi網絡,即可控制,開始你嘅監視任務!由於WiFi訊號比較強,喺無障礙下,最遠遙控距離可遠達200呎,而即使有牆阻隔,亦可在100呎範圍內控制。操控方面,兩邊前後掣,分別控制左右轆的前進和後退,利用不同組合即可做出前、後、左、右、自轉等動作。而佢嘅GDrive功能就更簡單,以體感操控,同用軚盤揸車差不多,玩唔慣遙控嘅女生一樣可以操作自如。另一特別功能,就係佢可以記錄行車路線,然後再自動重新行一次。玩家大可Set番條指定路線畀佢,等佢自動巡邏,夠晒過癮!
售出:約$1,500(12月推出)
查詢:華仁影音(27877992)