黎燕珊、黃日華夫婦、石修夫婦，噚晚喺沙田出席「民生關注會第九屆委員就職晚宴」。

提到前夫劉永日前接受《蘋果》專訪，講到同仔女仍有聯絡(新聞連結： http://bit.ly/2fPXHhU )，珊姐坦言：「聽佢噏啦，邊有聯絡呀，由佢講，放過我啦，我唔想再講佢喇！」珊姐話o依家睇到仔女乖，過去發生嘅事已經唔重要：「阿仔已經去咗英國讀書，之前有個謝師宴，喺宴會上見到個仔唱咗周柏豪《最好不過》送畀我，多謝媽咪一直冇放低過我哋，順境逆境都一齊，過去事已不重要，好感動。」

點睇劉永娶30歲太太？珊姐話：「我唔知呀，不過周不時聽到呢啲奇聞，不評論，佢開心咪得，祝佢家庭幸福。」仔女有冇問爸爸事？佢哋唔會問，有佢電話、微信，睇到佢啲家庭相。」囝囝去英國讀書，怕唔怕佢同鬼妹拍拖？珊姐直言：「拍拖係好事，唔通做宅男好咩，鬼妹都唔緊要。原本約咗阿女同佢男友朋友去英國曼城探仔，不過我要開劇，未知幾時過去，我同仔講想聖誕去探佢。」

曾患上急性白血病嘅梁潔華就精神奕奕咁同老公黃日華一齊到場，華哥指太太情況ok，現時每兩個月就去覆診。另談到囡囡芷晴搞網上生意，華哥話：「佢(芷晴)有好多諗法，又話整首飾，開cafe，整甜品，一時一樣，不過佢整蛋糕、曲奇ok㗎，佢之前喺屋企整咗啲低糖蓮蓉月餅，整完我即刻食晒。」囡囡開cafe會唔會經濟上支持吓？華哥話：「都要傾吓，睇吓佢有冇興趣囉！咖啡好多研究，唔係陳豪咁專家級。不過開甜品店一定會支持。」

日前有周刊刊出劉德華同女生活片，華哥聽後即說：「咁犀利，佢着重家人私隱。好難講，同fans搞生日party，可能有人偷錄，我同佢識咗咁多年，都知道佢唔鍾意公開家事，不過我哋冇咩所謂。」華哥最近喺大陸發展，但冇拍劇，因為體力應付唔嚟，o依家商演為主。