前日用買賣蘋果遊戲比喻Accumulator，同事細May即刻問，「咁嘅遊戲都有人會玩嘅？街市賣5毫子一個蘋果，你要日日用5蚊買100個返嚟！」細May有所不知，Accumulator大熱嘅時候正係前幾年大牛市，好記性嘅話，大家應該仲記得，當時嘅仙股少過家陣嘅紅底股，港交所兩張紅底都買唔到一股。
代入番蘋果遊戲，當時一個蘋果閒閒哋賣10蚊，仲要同人搶，你日日就可以用5蚊買100個返嚟，就算自己唔食，即刻拎去街市賣都唔憂冇人吼。正如敏妮前日所講，當你日日見住10蚊個蘋果，個個走去搶嘅時候，冇人會諗到個蘋果有一日跌到5毫都冇人要。

不過，呢個蘋果遊戲最刺激嘅地方，敏妮仲未講，就已俾讀者朋友喺敏妮blog度「率先披露」。呢個蘋果遊戲最刺激之處係，你每日可能唔止買100個蘋果咁少。因為遊戲仲有一個玩法，就係到某個價時買雙倍甚至三倍，用番前日蘋果遊戲嘅例子，街市賣緊10蚊，接貨價係5蚊，你仲可以整個double接貨價，例如街市嘅蘋果賣得平過10蚊，你可以用5蚊買到200個蘋果。
點解蘋果跌價，仲有人肯接雙倍貨？都係嗰句，因為呢個遊戲喺大牛市推出，試吓諗番當時啲投資者/投機者嘅投資策略──「隻股票日日係咁升，如果佢回番啲，我即刻飛撲瞓身買！」
細May再問，「如果個市真係繼續升，咁發起玩呢個遊戲嘅人咪輸囉，佢要日日用低於市價賣100個蘋果噃。」有把握同人玩呢個遊戲，當然會計定得失，為自己開定安全網。其實Accumulator係一啲好複雜嘅期權組合，透過組合可令自己立於不敗之地兼獲利，複雜嘅期權組合唔講，淨係睇人哋有個gameover價就知佢已為自己設立咗安全網。

正如敏妮之前所講，衍生工具並唔係洪水猛獸，只係睇你識唔識善於運用，同抱住乜嘢心態投資。
溫敏妮
http://wanmanli.com/blogs/