當年今日
關於我們
701收料站:跌市奇葩話玖源
蘋果日報 2006/05/16 08:00
雖然話就話預咗昨日股市會跌,但又確實想唔到跌成407點咁勁,加上外圍股市亦唔好,好多原本炒得好哋哋嘅股票都被拋售,實在令人覺得有啲心怯。
好似昨日講到嘅DBA電訊(3335),雖然幕後人喺1.50元水平起收咗唔少貨,更一度倒升至1.57元,但最終敵唔過大跌市,跌1%收場,收1.51元。
不過,昨日一樣有跌市奇葩,就係本月初以每股0.78元配股集資6300萬元的玖源(8042),市場發現富達基金接咗貨(家陣持有成8%),昨無視大跌市,股價大升10.53%,收1.05元,成交股數1423萬股,金額1488萬元。
經紀黃話,同玖源業務類似,都係生產肥料的世紀陽光(8276),股價喺1年內,由1元炒到最高5元,現價往績PE高達23倍,而玖源唔夠10倍,又有大基金坐鎮,所以就算跌市仍然吸引好多投資者。
慕容小初