舞台劇有一個必要步驟，叫做「圍讀」。好簡單，決定了台前幕後所有人後，大家坐低，可以係圍個圈，可以係排成一條直線，鍾意點都得，總之由導演帶領下，請各位演員讀一次個劇本先。事後可以有啲關於劇本上嘅討論，製作上嘅介紹。亦都可以當大家見過面，認識吓。冇乜特別深奧嘅專業程序喺裏面。我讀書嗰陣每學年都有三五七次，每次聽到學兄黃秋生讀出絲絲入扣嘅對白，簡直係如沐春風。老師話全世界無論舞台劇、電影、電視都係咁。
出嚟做副導演之後，一次都未見過，我開始懷疑老師講嘅嘢，有次忍唔住扮八卦問個導演：「咦，你哋唔興圍讀嘅咩？」個導演用厭惡性嘅眼神望住我：「你咁得閒，你同佢哋讀囉！」哦！原來係唔得閒，明白。

早年拍電影嘅日子，大家真係好忙，基本上到正式開鏡嗰日至會齊人，重係趕住走要接下一組，所以你叫班明星圍讀真係睬你都儍，況且根本都冇劇本，或者係有個諗住邊拍邊改嘅劇本，都唔知點讀。
後來做咗導演就梗係想顯示權力，未開鏡前同個製片講：「幫我叫晒班演員返嚟圍讀。」過咗兩日製片話我聽有一半人唔得閒，有啲話睇劇本得喇，唔使讀，有個叫製片問番我個劇本改好未先？有個歌星話佢唔嚟，叫個保母代佢讀，得唔得？問你死未？結果喺唔齊人嘅情況下圍讀，作用不大。只係顯示咗我冇乜權力。咁以後都冇再搞。
拍《無間道2》前，終於可以叫齊演員嚟「圍讀」一次，諗住大家事後可以展開熱烈嘅討論，點知變成被眾人「圍毆」一次，所以，以後都係要諗吓先。