賀賢上季成績大倒退，幸好在拉士兩個半月奮力追數，最終贏得20場頭馬。上季起步開得唔錯，在10月份贏四場，可惜之後出現斷層，不少馬匹搏殺失手，經常屈居亞軍。

睇往績，其實賀賢是較為慢熱的，前季5至7月共取16場頭馬，單在5月已贏八場，馬房手法如此，相信今季部署模式唔會有大轉變。

論操練賀賢都屬明刀明槍，循序漸進地施加壓力，如「幸運時代」上季一出即勝。

賽前操練積極，一早由潘頓過檔，有拍跳工夫，然後試兩個大閘，一切準備就緒，在直路賽落飛搏殺得手。

「百步穿雲」上季轉戰快活谷，賽前由潘頓兩度試谷閘，結果僅敗於路程專家「幸運興隆」，稍後便連贏兩仗。

「赤火神龍」情況相若，谷閘有過好表現，減夠分落班，轉戰快活谷又成功出冷。

所以賀廐出擊馬，賽前一定有精心部署，多留意操練及試閘，就不難捉到。

雙潘是賀賢兩大主將，跟潘頓一向合作愉快，徒弟潘明輝越見成熟進步，放馬OK，鬥後勁也有板有眼，相信今季繼續倚重雙潘做殺手，至於沈拿、何澤堯、梁家俊及蘇狄雄都有合作機會。