自言「一把年紀」嘅阿Sa，搵到Mr.Right當然要打鐵趁熱，7月1日上晝約8點45分，阿Sa同男友石恆聰(Anthony)由香港飛東京羽田，預支蜜月。

兩口子離開香港仍然好戒備，喺羽田機場等過關時，阿Sa同男友沿路都有傾有講，不過阿Sa見有人望佢，佢就會擰歪面有啲避忌。

直至出咗羽田機場嘅入境大堂時，終於忍唔住攬實女友條腰，又搭女友膊頭，人少少嗰陣，仲趁機拖女友手，但見有香港人喺附近，又即刻鬆手。

今晚阿Sa同男友雙雙抵港。因為早知有批傳媒守候，所以兩人分閘出。約8時左右，身穿白衣嘅Anthony由A閘出，阿Sa就由B閘出，記者即上前追訪。問到Anthony此行是否好開心呢？當然未有回應，只係講咗句：「唔該借借。」喺行去停車場嘅過程中，全程黑住面，之後上七人車離開。

記者再問Anthony是否家人好鍾意阿Sa，他亦未有回應。

阿Sa同男友石恆聰分別坐黑色座駕及銀色七人車離開機場，Anthony唔知係咪有心，離開時銀色七人車車速明顯比阿Sa黑色座駕慢，讓阿Sa率先離開。之後男方於8點42分返回畢架山獨立屋寓所。