香港地運，旺個曾字，曾鈺成操控過廢董、曾蔭權領導公僕、曾憲梓就做咗愛國黑面判官。邊個係愛國，乜嘢叫唔愛國，呢兩日搞到全港一片烏煙瘴氣。好多人驚終有一日，淨係有張香港永久居民身份證冇用，重要加多一張「愛國人格優質證」，由胡溫人民政府授權曾憲梓所領導嘅「愛國檢察委員會」簽發，繞過廢董，向胡溫直接問責。

林公公消息唔靈通
例如，前日維園論壇，大律師梁家傑抨擊土共濫用「愛國」標準，阻撓其他非土共人士參政。梁大狀講嘢，台下愛國嘅維園阿伯揸住啲用蒸餾水樽剪開做喇叭嘅傳聲筒，例牌用粗言穢語厲聲叫囂，代表胡溫問候梁大狀及民主派令壽堂，由於實在太過神憎鬼厭，在場嘅警員，都睇唔過眼，要出手阻攔。
咁呢啲阻住維園阿伯狂嗌嘅警員，令到親者痛，仇者快，日後就好小心啲喎，因為阻撓我哋維園愛國同胞發言，係好唔愛國嘅行為。梁家傑哋講嘢，攻擊祖國，唔囂張咩？點解警員唔攔阻？李明逵應該指示吓啲夥計分清大是大非，如果唔係，縱容警員阻撓維園愛國阿伯對梁家傑等民主派嘅愛國審判，即是暗中畀空間民主派散播賣國言行，連李明逵，甚至佢老頂保安局局長李少光，亦即齊齊犯下唔愛國嘅罪行。
用愛國X光鏡一照，好多人就即時現形。嗱嗱嗱，啱啱跟隨曾蔭權上北京，至話遭到京官羞辱話「以前未見過你」嘅政制事務局局長林瑞麟，噚日又加把口。佢話，佢未聽過胡溫人民政府已經否決咗二○○七年普選，又話香港人「整體」係愛國嘅咁講。

林公公官職咁低，北京官員講到明唔識佢，亦即表示唔承認佢嘅存在。胡溫就算否決咗○七年普選，林公公呢隻D9級又點會有資格咁快聽聞到？呢，問曾憲梓就知嘞。佢話「照佢所知」，胡溫中央人民政府絕對唔會畀香港二○○七年普選。黑曾係人大常委，接近權力中心，消息梗係可靠。林瑞麟未識死，竟敢代胡溫對香港人作出評價，話香港人「整體」都重係愛國，因住又會俾國家發言人鏟佢胡說八道喎。
重有個香港總商會嘅翁以登，又係唔知碇，有紅酒喺屋企你就飲喇，嘿，係都要屹個頭出嚟話政制改革好複雜，同二十三條立法係兩回事。翁以登個名已經有李登輝嘅登字，佢不但係美籍，一口美式英語，口音似足美國副總統錢尼，經翻查紀錄，佢以前重做過美軍㖭！
咁就大鑊嘞。美軍曾經喺韓戰時期，同我國嘅人民志願軍喺韓國直接肉搏火併，美國軍機最近重重炮擊落我戰機，殘殺埋我空軍王偉。翁以登做過美軍，將來不但冇資格領取愛國人格優質證，重應該隨時加以逮捕，由維園阿伯做陪審團嘅特區愛國法庭公審㖭。唔出聲冇人話佢啞，呢次佢送上門，證明曾憲梓二月十三日黑色星期五嗰日嘅愛國論（以後簡稱「曾人大二一三講話精神」），果然引蛇出洞，大亂了敵方陣營，壯大了我方聲勢，真係好得很喎。


傳真︰2623-9278
電郵︰[email protected]