昨天大市終於回升，期指升了248點，為近日低迷的大市平添新景象，本欄連日提醒跌市勿追沽，應該錯不了。其實跌穿250日線初期，通常都以急跌急升開始，到跌勢確認方才追沽，經常會遇到急升，以致進退失據。
為何跌市時會出現急升呢？因為投資者見到低位通常患上回歸中軸聯想症，不期然買入牛證或個股博反彈，但瞬間跌破止蝕位，紛紛沽貨離場，形成急跌。急跌引來對冲基金玩音樂椅遊戲，搵弱勢股沽空，大戶不是贏定，因為有更大戶一個挾倉，遂冇鞋挽屐走，空頭回補，形成急升。我等散戶宜坐山觀虎鬥，等急升後才施施然出來沽空，定好止蝕，在跌市中賺錢。
說易行難，大市急跌時散戶經常對自己說一彈即走，但大市出其不意反彈，通常有好消息配合，就算冇亦必挾雷霆萬鈞之勢急升，散戶不但唔走，反而買多點或走後見升勢持續，又再入市，所以筆者前天已講明要想好後向。既然如此，為何不將昨天近300點的升勢作為升浪開始呢？

未見基金經理掃貨

沒錯，昨天可判斷是反彈的開始，皆因大市由頭升到尾，近500億元成交也算勉強交貨，但大升的多是之前大跌之板塊如家電、手機及藥業股，大有挾淡味道，其他與大市同步的個股表現卻一般，所以未來走勢反彈可能性很大，但從此上升士佳則投懷疑票。前日發改委宣佈，23項重點工程投入6822億元人民幣，只推升鐵路基建股，如果是大牛市應升個滿堂紅，但昨日升得懶懶閒，雖不代表日內唔會續升，但基金經理完全冇撲入去掃貨的味道，且看今天後續力量如何。
本欄長期讀者應知道，睇法不等同做法。睇法是自己一廂情願，但做法要市場認同，這個反彈按理應升至20300以上，且看升勢是否受阻，到時再沽未遲。此刻，揸住少少股票湊湊反彈浪便算。

張士佳
mailto:[email protected]