【拍15,000集播得一半】大陸劇製作過剩 劉詩詩「新劇」倉底鋪塵兩年
劉詩詩佟儷婭倉底貪
大陸宮廷劇《延禧攻略》熱播,捧紅咗一班後宮佳麗吳謹言、秦嵐,眼見娛樂事業興盛,唔少本港幕後工作人員都北上搵食,不過風光背後,大陸電視劇面對製作過剩問題。據大陸媒體報道,一年製作咗約15,000集電視劇,但每年可以播出嘅只有約8,000集,換句話講,有差唔多半數劇集成為倉底貨,日積月累,好似滾雪球咁滾大。
呢一堆倉底貨,就算係有一線男女藝人參與亦不能倖免,好似佟大為、劉詩詩主演嘅46集時裝劇《如果可以這樣愛》,自16年起已存倉2年;佟儷婭主演嘅《愛無痕》、劉濤及馬天宇主演嘅《淘婚記》存倉亦超過3年,仍然放映無期。報道中列舉嘅劇,仲有套由吳卓羲、唐嫣主演嘅《格子間女人》,報道話套劇等咗6年都冇出街,有大陸人由16年起到今年,喺視頻網站都仲留言好想睇仲問幾時播,不過屬於「境外」嘅大台,一早就放咗呢套劇上網。
電視劇製作過剩,難以收回成本,唔少都尋求「轉型」改為網上播出,加上大陸實行「一劇兩星」政策,即係同一部電視劇,要遵守兩條規則:
1.每晚黃金時段聯播嘅衛視綜合頻道,唔可以超過兩間;
2.電視台就算安排劇集喺黃金時段播出,亦唔可以播超過二集;
以上種種都令好多劇拍咗搵唔到機會播,重災區係古裝劇,積壓數量驚人,其中一個原因係每間電視台,每年唔可以播出超過兩部古裝劇;其二係題材問題,正如早年一窩蜂拍穿越劇,當大陸政策改變禁播類似題材,統統都會變成倉底。
精選娛聞,喺晒《娛果》
http://fb.com/appledailyent
一線藝人如劉詩詩同佟大為,未必係上映嘅保證。(網上圖片)
劉濤嘅《淘婚記》未能承《琅琊榜》嘅氣勢。(網上圖片)
劉濤嘅《淘婚記》未能承《琅琊榜》嘅氣勢。(網上圖片)
部份存倉超過2年作品,古裝劇係重災區。(網上圖片)