日理萬機嘅商經局局長邱騰華，可能見到商界唔再咁擔心修訂《逃犯條例》，今日居然得閒遊電車河，仲做埋導遊介紹香港？事緣佢今日為旅遊事務署同香港設計中心合辦嘅「#ddHK設計#香港地」啟動禮做主禮嘉賓，開始前仲坐電車遊港島。局長呢日心情大靚，除咗邊吹風邊介紹呢個創意旅遊發展計劃之外，仲雅興大發不時拎手機出嚟街拍，睇嚟局長心底其實都係一個藝術家嚟。邱局長話，以前已經覺得灣仔好「Amazing」，因為每日早午晚都有唔同嘅景色，非常代表到香港。

咁到底「#ddHK設計#香港地」係咩嚟？原來呢個3年計劃今年已經踏入第2年，佢哋上年就喺深水埗做咗唔少街頭藝術，而今年就喺灣仔新增6個由本地或者海外藝術家設計嘅作品。好似平日人山人海嘅柯布連道行人天橋，現時天花就由本地藝術家「一口設計工作室」設計，以香港四季變化同埋原生動植物為主題嘅平面設計，附近返工嘅市民行過都可以放慢腳步欣賞吓。

負責籌備呢個計劃嘅香港設計中心主席嚴志明話，呢個計劃唔單止係為咗吸引遊客，仲希望香港市民都可以透過呢啲作品重新認識社區。而整個3年計劃耗資6,000萬，未來仲會選擇多一個香港地方創作，不過嚴就未有透露喺邊，淨係話希望呢個計劃可以帶動香港發展深度遊，唔知住喺其他區嘅市民，日後想唔想屋企附近可以多兩幅手繪畫欣賞吓呢？

-----------------------------
《蘋果動新聞》訂閱新世代，4月開始免費訂閱，現在接受登記！
http://bit.ly/2Ja3IXw
-----------------------------
《動腦Q》周末主題夜
追加星期六、日 9:30 pm
星期一至五 10:30 pm
Day Day Q the money!
https://hk.adai.ly/UkZT7poxmV