國際友誼賽，各國教頭主要都係想試陣，勝負反而次要。今個國際賽期，如常有名牌球隊孭飛，記得避開巴西、意大利同德國三軍。此外，自由盃決賽隊聖保羅受讓，亦咪以為好筍！
巴、意、德呢三支球壇勁旅，都係由新帥領軍嘅第1場波。由前國腳鄧加領軍嘅巴西，作客對挪威嘅大軍名單中，新人佔大多數。好明顯，鄧加諗住喺呢場波試吓新人。原來挪威亦係巴西「剋星」，歷來對賽三次未輸過，係世上少數未輸過畀巴西嘅國家隊之一，呢晚點做森巴球迷呀？

意軍選將人面全非

意大利就有少帥鄧納東尼首度領軍，喺主場對克羅地亞，選人梗係同世界盃捧盃嗰隊面目全非。克羅地亞爛船總有三斤釘，意大利用副選踢都無話贏實。盤口仲要係意大利讓到半球，上盤難有運行。
至於德國主場對住世界盃16強手下敗將瑞典，未必容易食。今次德軍同巴、意兩強唔同，沿用番世界盃班底人腳；但一班長期正選未必肯落力踢，始終德甲聯已開鑼，整親手腳無咗球隊正選就弊。
而南美自由盃決賽次回合，首回合落後緊1:2嘅客軍聖保羅，初盤竟受讓平/半。雖然話主隊國體會和波都捧盃，但聖保羅少咗件前鋒猛人奧利華拉，依家變平手盤，梗係捧國體會。文：華度