【新增內容】

應屆候選港姐、前組合As One成員陳苑澄，日前佢喺fb貼咗條玩「Kiki challenge」嘅片，結果惹嚟瘋狂負評，俾網民狂鬧佢：「害人害物。」「咪阻X住個巴士站啦。」「弱智都選港姐，仲抖音。」「跳得一啲美態都無。」「有無再落車執返垃圾？」「拍片者危險駕駛，片主就亂丟垃圾。」《蘋果》問過黃國桐律師，佢回覆話：「呢件事的確係觸犯不小心駕駛，唔需要有意外，只要駕駛者沒盡應盡之駕駛責任、令其他駕駛者有危險已經係。不小心駕駛會扣五分，罰款一千元以下。」(新聞連結： https://bit.ly/2OF6HW7 )

噚晚《蘋果》曾經有聯絡過陳苑澄，但係未有回覆，不過以往有唔少藝人出post惹負評之後，跟住好快就會刪post，又或者開post留言兼道歉，但係陳苑澄到o依家都冇喺fb刪走條片，咁啱得咁橋，佢今日下晝又會喺銅鑼灣出席活動，聽講無綫高層對於陳苑澄呢個行徑有啲不滿，認為佢過咗火，按照一貫慣例，「照肺」似乎係無可避免嘅事，仲叫佢今日出席活動，都會為解晝，唔知到時佢又會點講呢？

陳苑澄今日喺宣傳活動上，分別接受報紙同電子傳媒訪問，喺訪問期間，佢為咗呢件事道歉，講講吓仲忍唔住喊，一直喺身邊傍住佢嘅港姐保母，亦早有準備咁遞上紙巾俾佢抹眼淚。

活動完咗之後，陳苑澄同埋其他佳麗，坐住公司安排嘅24座離開，話晒啱啱做完訪問，喊住咁講對唔住，心情梗係唔多好，之後架車去咗天后放低晒佢哋，佢同埋其他佳麗坐地鐵走人，不過因為有好多傳媒跟住佢哋，所以大家都明顯避忌，各自各分開坐。

去到中環站之後，陳苑澄轉坐東涌綫，期間見佢拎住本好似係心理學嘅書出嚟睇，冇耐見佢喺青衣落車，買咗支嘢飲之後就返屋企。

精選娛聞，喺晒《娛果》
http://fb.com/appledailyent