建行（939）上月11號變身藍籌股前後，股價陰啲陰啲咁跌，最低見過3.24元。睇住大市係咁升，建行捧場客難免谷到一肚氣。隻股呢兩日有啲起色，成交轉活，噚日最高見3.51元，收報3.49元，升2仙，但係有散戶見過鬼怕黑，對佢仍然冇信心。
噚日「Yahoo討論區」內，網友raynsy察覺：「939好像後力不繼，開始有啲啲回……今次學聰明少少，因為好多認購證都是3.48左右，所以會不會又給大行打壓，不准939上3.5元？」
chanyung88見好就收：「我昨日放咗咯，不貪心，有得賺快點走了。」
「鄭經翰」則有驚人預測：「939大屠殺即將出現，有貨好走lu……即將出現互相踐踏情況……沽哇！」

建行近半年喺3.20至3.60元間橫行，噚日升穿4月底開始伸延嘅三角形降軌阻力，保歷加通道開始向上下撐闊，MACD線重上0線之上，由雙熊轉為熊牛訊號，技術走勢向好，按三角形量度升幅，目標價4蚊，跌穿3.24元先行止蝕。
上月底，麥格理同雷曼出報告睇好建行，目標價分別係4.20元同3.90元。根據彭博嘅資料，睇估值，建行預期PE只係16.86倍，係咁多間喺香港掛牌嘅內地銀行股中最低。嚟緊有工行上市，內地銀行股應該繼續被熱捧，「大屠殺」？唔多似喎。
余文