英國殿堂級傳奇樂隊Queen拍住美國同志歌手Adam Lambert噚晚首次來港開騷，於亞博館舉行演唱會。Queen於1971年成軍以來，香港樂迷等佢哋嚟開騷等到頸都長，可惜主音Freddie Mercury於1991年因愛滋病離世，而低音結他手John Deacon亦於97年宣佈退休，剩下結他手Brian May及鼓手Roger Taylor繼續發展，所以噚晚有好多樂迷捧場，入座率爆燈。

Queen噚晚8:20分左右開場，以《Seven Seas of Rhye》揭開序幕，成晚唱足22首耳熟能詳嘅經典歌曲。雖然Queen嘅歌出名難唱，不過歌唱比賽冠軍級人馬Adam都應付自如，展示高超唱功。佢亦穿上妖爆嘅舞衣配合姣味十足嘅舞步加表情去演繹歌曲。當佢唱到《Stone Cold Crazy》時，將咪架夾喺大腿之間用手狂chok，相當狂野！

Adam唱到《Killer Queen》嗰陣，換咗套黑色羽毛裝配4吋高踭鞋，拎住把扇坐喺寶座度唱，其間Adam舉起飛毛腿，之後佢就用獎杯飲水，仲百厭咁向觀眾噴水。佢同觀眾講：「大家好嗎？多謝你哋嚟。我要多謝台上嘅傳奇人物Brian May同Roger Taylor，俾機會我着咁浮誇嘅衫獻唱，同時可以向Freddie致敬。Freddie只有一個，係唯一！」Adam之後唱出《Somebody to Love》前，自爆現時係單身，叫港迷幫佢搵對象，亦叫觀眾畀多啲反應話：「我唔想講上海high過你哋啊！」