韓國綜藝節目《Running Man》(RM)今日晏晝播出最新一集，內容將緊接上集，繼續劉在錫、李光洙及HaHa、楊世燦嘅懲罰之旅，節目播出前，節目組率先公開預告相。

上周播出嘅內容中，劉在錫及光洙要到澳洲體驗鱷魚死亡之籠（Cage of Death），獲池錫辰、全昭旻陪同。之後劉在錫及池錫辰仲進入透明嘅玻璃制容器中，率先與鱷魚近距離接觸。而今日播出嘅內容中，光洙就要自己一個進入容器，同大型鱷魚上演「死亡之吻」。

除咗體驗鱷魚死亡之籠，劉在錫等人仲要坐船去到鱷魚常常經過嘅河道。難得咁近距離觀察野生鱷魚，「國民MC」劉在錫亦相當敬業，手持GoPro認真拍攝，將現場嘅感受如實傳遞畀觀眾。不過劉在錫只顧拍攝未有留意到岸邊嘅樹枝，唔小心整跌咗部機，令現場所有人陷入崩潰。雖然相機浮喺水面，但因為鱷魚不停游嚟游去，伸手去執就會有被咬嘅風險，但如果唔執，呢段時間拍攝嘅畫面就會冇晒，搞到眾人都唔知點算好。

另外，HaHa、楊世燦就獲金鐘國、宋智孝陪同，前往紐西蘭體驗160米峽谷鞦韆（Nevis Swing)，一行人要行過吊橋先可以到達峽谷鞦韆嘅位置，一向膽小嘅HaHa、楊世燦唔知又會帶嚟咩笑料呢？

此外，《RM》日前又到台灣拍攝外景，HaHa、池錫辰、楊世燦喺機上已經被捕獲，HaHa更大方同粉絲合照，隨後眾人到日月潭拍攝時繼續被捕獲。

更多韓流，喺晒《娛果》
http://fb.com/appledailyent