劉綽琪同李純恩主持無綫嘅節目《澳門新概念》,噚日喺尖沙嘴舉行記者會,請咗樂隊Soler、港姐陸詩韻、林莉、黎芷珊及Joejunior出席。無綫安排幾位嘉賓分成兩組,比賽煮糖水喳咋,點知途中用嚟煲糖水嘅玻璃煲突然爆炸,玻璃碎片四散,好彩陸詩韻同黎芷珊閃得快,先至保住靚樣咋!
當時陸詩韻、李純恩、黎芷珊同Soler嘅大哥Julio一組,個煲煮咗幾分鐘之後,陸詩韻準備冚煲蓋時,玻璃煲突然爆開,現場成班女星就嚇到大叫,紛紛退後,好彩重有個臨危不亂嘅Julio,佢第一時間飛撲上前熄咗個火,平息咗呢場風波。