十一月二十九日，九大報紙刊登咗一個特別矚目嘅廣告，就係報壇前輩，年過古稀嘅韋基舜先生（人稱舜哥）不惜大灑腰間錢，將佢嘅大作公諸於世。
呢篇文章，多過五千字，係舜哥駁斥「古物古蹟辦事處執行秘書」吳志華博士及一位左丁山不知其為何許人也嘅高添強先生，關於「國父被囚域多利監獄」一事。此事之歷史事實太長，不便引述，請大家睇廣告，睇吳博士、高先生分別喺《明報》及《信報》刊登嘅文章。此事就中環警署古蹟群如何保護，可否部份拆卸之辯論而來，舜哥嘅立場係「保護派」，中區警署、域多利監獄，係舜哥出世以來，日夕為伴嘅老建築物，好有感情；吳博士係公務員，代表官方態度。

左丁山想講嘅，係為乜嘢舜哥大動肝火，要自掏腰包刊登廣告，花費以十萬元做單位。據打聽所得，原來舜哥想同吳博士在報紙上辯論，但佢想投稿去《明報》、《信報》，兩報都嫌佢寫得太長，唔肯登，但吳博士嘅文章都好長啫，舜哥認為報紙分明玩大細超，努力爭取一輪之後，結果得個桔，於是為咗一啖氣，憤然投稿「廣告」，在九大報紙（包括《明報》、《信報》在內）刊登，讓全港讀者或者對此事有興趣嘅歷史專家睇個明白，或有拋磚引玉嘅作用。
諗深一層，如果吳博士、高先生再喺報紙駁斥舜哥，舜哥唔通又要賣廣告回應？佢雖然生於鐘鳴鼎食之家，身家大把，一班老友都為佢肉痛，香港話係有言論自由，但如果冇報紙、傳媒提供發表言論嘅空間，言論自由就唔該你用花花碌碌嘅銀紙去買，呢個問題，值得再諗。