一直冇人關心嘅東亞運，終於因為火炬傳送受抨擊成為焦點，政府為免被指明益TVB，決定傳送火炬最後一棒由電視城改到金紫荊廣場。不過無綫高層陳志雲噚日卻話，其實佢哋都唔想火炬送入電視城，只係政府堅持，「我哋一聽到（火炬送入TVB），已經同政府話會唔會唔適合。」

陳志雲稱唔可惜

據陳志雲稱，聖火傳送路線完全由政府話事，佢只係獲「知會」路線有變，得悉聖火唔入電視城，佢聲稱「完全冇覺得可惜！」因為傳聖火係香港盛事，應該喺公開場地搞，送入電視城感覺唔協調，事關電視城係做騷地方，唔係競技場。
講到聖火傳入電視城好似係政府是是但但霸王硬上弓，無綫今次咪好委屈？陳志雲話都係做生意啫，「個客人（指政府）覺得可以入嚟，我哋亦只係提供一種服務啫。」
聖火唔送入電視城，陳志雲如釋重負，令人思疑背後另有「玄」因。聖火本身就係好惹是非，去年奧運聖火海外傳送，所到之處示威抗議不絕，傳到大陸後又有天災，當時已有人覺得唔妥。雖然東亞運聖火同奧運聖火唔同，但似乎都係「惹火尤物」，唔送入電視城可能好啲。

聖火不可亂咁傳

玄學家吳佩孚同八方講，聖火本身重陽氣，可以帶旺地方，但如果送聖火方位有差錯，卻可以好大鑊。據吳師傅稱，假如TVB安排聖火經由向北嘅門進入電視城，聖火會燒旺災星；若然錄影廠道門向西，即係最後一棒聖火由西面傳送而來，病星就會火上加油。不過佢強調，如果校啱方位傳送聖火，係絕無問題嘅。
而德成局長噚日就話死撐由TVB包辦傳送聖火節目冇問題，認為只係有傳媒不滿採訪安排先舊事重提；康文署表示有將承辦節目嘅標書以掛號信分別寄畀TVB同ATV，反駁ATV冇收過標書嘅言論，聖火未嚟到已經辣起咁多火頭，呢把火真係唔嘢小！
mailto:[email protected]