近來無綫劇集都有藝員出事,好似馬浚偉之前拍《守業者》時整傷眼及鼻,鼻骨爆裂腫脹,之後又試過心臟不適;而楊怡拍呢部劇時,亦因為頸椎有事,痛到郁唔到,瞓咗兩日醫院;
之後就輪到《飛虎II》,好似王君馨拍跑落山戲時,疑踩中雜物跣倒傷腳;羅仲謙拍攝廠景爆炸戲時,不慎滑倒被強化玻璃碎片插傷大腿;早前鍾嘉欣同馬德鐘拍爆破戲時,因馬神失手而令嘉欣BB變撻生魚,爆缸狂喊,認真陰功!
而0依家播緊嘅《巨輪》,近日亦有藝員發生交通意外,噚晚阮兆祥駕駛平治跑車沿尖山隧道往長沙灣方向行駛,當駛至管道出口附近時,疑切線失控,撞向前面私家車,打「白鴿轉」後橫亙路中,車頭損毀左前轆爆裂,好彩阮兆祥冇受傷,事後祥仔受訪時都話唔好意思,好彩大家冇事;
今晨9點半,陳展鵬喺上環炒車,而當時有指貌似鍾嘉欣嘅女子喺車上,發生意外後,疑似鍾嘉欣即落車狂奔,現場得返陳展鵬喺度,事後陳展鵬照樣出發去澳門,不過問佢當時車上係咪有鍾嘉欣時,佢只係不停話唔好意思;反而鍾嘉欣事後就話兩人原訂出發到澳門,出席劇集宣傳活動,由於佢哋唔係喺公司出發,所以坐展鵬順風車。
雖然發生交通意外,但阮兆祥﹑鍾嘉欣及陳展鵬今日如常去澳門媽閣廟宣傳《巨輪》,同劇演員張繼聰、田蕊妮、蕭正楠、貝安琪等都有出席,而眾藝員都有參與拜神儀式,拜得神多自有神庇佑,祥仔及展鵬上香時特別誠心,之後展鵬仲同傳緋聞嘅貝安琪合照,但兩人表現有啲尷尬咁。