三位男士飲到凌晨5點幾,已經不勝酒力要先後離開,黃浩行起嚟仲左搖右擺,要由身邊友人扶住落斜路。至於齊昕同女友就精力充沛,喺Volar玩到噚日朝早6點至肯走,佢哋離開時已經醉到腳步浮浮,兩人拖到實一實,齊昕同朋友去咗門口截的士,Volar嘅保安喺門口見到有記者喺度影相,但齊昕同朋友又唔係好知想點咁搞足一分鐘都冇動靜,最後保安幫佢哋截咗部的士送佢哋走。
正當以為齊昕會坐車返屋企,點知有讀者Ricky噚日報料,話朝早7點45分左右喺中環威靈頓街間翠華見到齊昕同個女仔一齊,睇番齊昕件衫正正就係clubbing件戰衣,相信佢哋坐的士兜咗個圈嚟食早餐。Ricky話當時齊昕望落好醉,後尾兩個人仲入咗男廁,女友人負責頂住度門,齊昕就係度大大聲唔知講乜,懷疑佢哋喺入面嘔。
採訪、攝影:徐錦池、羅德光、吳耀輝