行政會議早前通過興建機場第三條跑道，點知呢個決定，令民主黨現分歧，事緣佢哋嘅立法會議員單仲偕，喺政府公佈決定後公開表示歡迎，隨即引起黨內少壯派反彈，民主黨交通事務副發言人柴文瀚甚至發起聯署，表明對耗資一千四百一十五億元嘅「三跑」計劃有保留。花生友聽聞，老鴿同乳鴿近日已經坐低，四四六六拆掂佢。

單雞唔收番「歡迎論」

其實呢次乳鴿仔反枱，惹嚟唔少謠言，有人話黨內少壯派藉機奪權，仲誇張講成係白鴿黨自編自導自演，無非係製造輿論畀阿柴上位。
花生友就此八過，聽聞政府公佈前，個黨都有就此交流，有黨員提出唔好熱烈擁抱「三跑」，以免中伏，單仲偕嘅發言其實都係跟番黨嘅官方說法，只係冇端端多咗句「歡迎」，點知出事。
花生友聽聞，單雞上周叫咗大家埋枱傾，得出三個共識，包括成立小組專責研究「三跑」。阿柴同花生友講明會爭做召集人，而單雞應該都會加入小組，實行和理非非傾出「三跑」立場。
另外兩點則係搞吓研討會交流最新形勢，並重申該黨對「三跑」嘅書面立場，但單雞就表明唔會收番「歡迎論」。
花生友噚日問過阿柴上述奪權、夾埋博上位等謠言，佢真係得啖笑，話正因為政府公佈消息時，民主黨中委嘅Group Chat討論「夾唔嚟」先會出來講，仲話自己都係以事論事啫。

花生友