【235磅暴肥回歸】情繫細20年哈爾濱姑娘 周文健一年即閃婚
父親節城市獵人孟波周文健
減肥keep弗絕對唔係女士嘅專利,憑大隻佬形象拍啤酒廣告走紅、現年56歲嘅周文健(Michael),近日以235磅形象「重磅」回歸,佢話自己呢啲叫做「幸福肥」。
幸福嘅來源,係佢嗰位祖籍哈爾濱、貌似唐詩詠嘅靚老婆孫婷。Michael話佢哋兩公婆喺06年於北京認識:「婷婷大我成20年,反過來囉…(即係Michael比老婆大)哈哈!嗰時見佢覺得比較純真,咦呢個我少見到有呢種感覺嘅女仔。其實我唔花心,即係唔似孟波個角色囉,比較老實。」
Michael同孫婷喺06年結婚,結識經過簡單得嚟有啲老土,原本喺上海住嘅孫婷,有次去北京玩,經朋友介紹下識咗喺北京等發展嘅Michael,孫婷講番相識經過話:「05年5.1假期跟一位女朋友去北京旅行,朋友介紹認識。都不算是一見鍾情,是第二、第三次吧。認識一年就結婚,也不算閃婚吧!因為交往沒多久,我就搬到北京和他一起生活。」
講到Michael有咩吸引到佢?原來係憑一個「傻」字,孫婷重提都覺得好笑:「到朋友家跟他玩搖骰,我作弊動骰子,他完全沒有察覺,每次都喝光。那我覺得,怎麼這個男人這麼傻,看不出又每杯都喝。」身旁嘅Michael申冤話:「唔知你出貓咋,知道我就唔飲啦!」其後兩人約會,孫婷有次帶咗一班美女朋友到場,發覺Michael目不斜視,覺得呢個男人好老實。
孫婷話認識周文健嘅時間已經知道佢係演員,電影有睇過少少,但都唔記得名,電視反而印象較深,因為剛剛播完一套叫《危險旅程》,連孫婷父母都有睇。Michael話:「佢睇完覺得我熟口熟面囉,第一眼見佢覺得表情同其他女仔都唔同,o依家先知嗰時佢剛剛畢業,學彈琴,嗰樣比較單純、純真,吸引到我。」
舊年Michael兩公婆喺珠海開咗間火鍋店,舖頭名仲食番「城市獵人」個名,叫「麻辣獵人」,Michael話唔做唔知,原來做餐廳係辛苦過拍戲,好在有太太打理。o依家生活安定好自然就諗到生兒育女,孫婷話:「我覺得我們倆現在這種狀況是很好的,就兩個人過,因為我們兩個人的性格都有點小孩子的,有了孩子你的責任也要變得很大。」
Michael講到令佢成名嘅生力啤廣告,佢話:「我都要多謝嗰個廣告,因為有嗰個廣告,有好多人搵我拍戲。其實不嬲冇乜戲癮,我係一個好鍾意電影嘅人,我剩係睇電影已經好開心㗎喇!」
採訪:何永寧、懷鈺
攝影:陳俊強
攝錄:馮峰、廖達燊
後期:Roy
咪睇Michael已經56歲,其實仲係好似一個大細路…
Michael同太太相差20年,但兩人似乎冇乜代溝。
Michael演《孟波》,好多人都話佢似原著人物。(劇照)