大摩最近有幾重用潘頓，一睇數據就一清二楚，5月至今兩人合作18次，得十冠兩亞一季兩殿，只三次不入前四名，勝出率超過50%，堪稱馬迷最佳捧場組合。

除今晚（5日）谷戰兩人又有「扎西德勒」、「活力勇士」攜手出擊外，星期六（8日）沙田日馬，潘頓亦會策「常感恩」、「帝勝之星」一對摩廐馬，協助大摩爭冠軍練馬師。

「常感恩」將跑周末三班1000米直路賽，這匹三歲馬上仗久休11個月後復出，竟可行過另一匹惡馬「遨遊戰士」，可謂技驚四座。今次匆匆再戰，仍居三班且騎師、路程不變，毫無疑問連捷機會甚高。

至於跑四班1400米的「帝勝之星」，以往由徐雨石訓練19仗不勝，轉去大摩後五戰亦贏不到，一共24仗過後仍是處女馬，似乎質素有限。然而牠歷來攞過四亞六季，絕非沒有戰鬥力。

上仗「帝勝之星」田草1200米明顯路程嫌短，結果在麥道朗胯下後追第四，走勢甚勁，反映近態出色。

今次潘頓肯騎，足見他認為此駒有取勝機會，大摩不但要爭冠軍練馬師，而且「帝勝之星」未交代亦肯定心急求勝，人馬戰意俱毋庸置疑。

---------------------------
【六四30】守住歷史 拒絕遺忘
https://hk.adai.ly/zdzKtt2RiW