無綫劇集《第三類暗戰》演員歐陽震華、梁靖琪、湯盈盈、黃浩然、楊婉儀昨日在將軍澳電視廣播城開鏡拜神，Toby全程黐住Bobby，如果Bobby不是有婦之夫，大家會以為Toby想追Bobby，Toby亦不否認對Bobby有好感。
Toby說：「好開心對住Bobby，同佢開工真係好好笑，一句好普通嘅說話，我見到佢個表情就已經會忍唔住笑，好似早幾日同Bobby拍場kiss戲咁，我都忍唔住笑。本身我條法令紋已經好深，搞到我笑親都要㩒住塊面，驚自己出皺紋！」

Toby坦承跟Bobby合作之後，已鍾情大肚腩，她說：「大肚腩，好肥美，又好攬，我自己都係鍾意有肚腩嘅男仔，仲要有幽默感。」Bobby知道細姪女不停讚自己，即時心花怒放，他說：「真係有taste，不枉我由細睇到佢大，細細個已經覺得佢有taste。」
湯盈盈甩拖後，一直備受關注，早前有雜誌拍到她有新男友，盈盈解釋說：「唔係，佢係我加拿大朋友，已經走咗！呢段時間我唔可以有男友，日日瞓得一個鐘，除咗呢套劇，仲要開《同事三分親》，所以唔可以開始新戀情，會對佢唔住，我咁忙冇時間同佢一齊度過熱戀期，或者拍完呢套劇先啦！」
採訪：楊潔雯
攝影：陳慧安