離開咗大台嘅樂瞳發展唔錯，最主要係佢識得獨立自強，而為咗照顧家人，好積極接工作，除咗推出寫真集之外，早前又被廣告商睇中，搵咗佢拍瘦身廣告。樂瞳話為咗拍攝前有最好效果，用輕斷食方法減咗兩個禮拜，效果唔錯。

其實樂瞳之前去檳城影處女寫真時，已經試過地獄式減肥，不過返港之後即刻大解放，狂掃大餐，佢笑話：「食咗唔少嘢，體重即刻升番晒，所以拍廣告前兩星期，我用輕斷食方法，務求以最弗狀態見人。」呢段時間佢只可以食流質食物，同飲排毒果汁，不過原本拍攝日，就咁啱遇正打8號風球，順延咗一星期至正式開工拍攝，樂瞳大呻：「搞到我又要捱多一星期，真係完全靠意志力撐住。」

去到現場拍攝又遇到另一難題，導演同攝影師一致認為佢喺廣告入面，應該以少女感覺示人，31歲嘅樂瞳話：「本來打算演輕熟女，當場就要調節心態，即刻播放我最愛嘅Bruno Mars歌，放鬆心情，慢慢越拍越投入。」拍攝廣告之後，佢嘅指定動作，當然又係食餐勁，佢笑話：「我去咗食好濃味嘅牛腩，希望未來有更多工作，我會keep住做運動，健康瘦身。」