【新增動新聞】
星期日舉行嘅中超聯賽，上海上港作客同廣州富力賽和1:1，不過上半場就快完場嘅時候就發生大規模球員衝突，而引發今次事件嘅就係效力上海上港嘅前車路士球星奧斯卡杜斯山度士，富力嘅李提香同上港嘅傅歡領紅被逐。

據報道，奧斯卡上半場喺中場附近攞到波之後，兩次將皮球省到富力球員身上，陳志釗衝過嚟將奧斯卡推落地，之後兩隊球員同教練就發生衝突，場面非常混亂。事件平息之後，球證同旁證商量之後將李提香同埋傅歡驅逐離場。