亞視不死傳說，又再延續，今日亞視電視數碼媒體有限公司正式成立，吳雨做亞洲電視行政總裁、區偉林做營運總裁。

劉錫賢亦回歸亞視，負責主持逢星期二《今晚見》節目，同朱慧珊、容海恩議員合作，內容講香港時事，問到係咪政治節目？佢話：「唔講政治嘅，主要講社會現象。」問到係咪公司落order唔好牽涉政治？肥仔賢拉開話題：「我原先做星期四王喜嗰個節目嘅，但王喜要做，所以我做呢個。」

會唔會擔心出糧情況？肥仔賢表示：「其實約就簽咗，對公司好有信心，對新老闆都有信心，已經見過面。」對新老闆荷包有冇信心？佢笑言：「老闆有請過我食飯，今次以部頭合作形式，主要自己服務一個節目，唔牽涉其他嘢，自己可以喺香港其他媒體出現，包括tvb。」肥仔賢話節目喺1月29日正式開始，問到人工有冇增減？佢表示：「冇多冇少，不過自由度高咗。」高層係咪畀好多信心？佢話：「係呀，吳雨大哥畀好多信心，同我講亞視又嚟，叫我一定要幫手，我同區偉林都見過面，大家都好渴望搞好亞視，其實同以前好大分別，至於財政就之後睇啦。」

問到再返亞視有冇影陰？肥仔賢坦言：「如果亞視之前冇停播，我已經喺亞視服務咗30年。」對於網民對亞視缺乏信心？佢話：「有兩批人嘅，一批好開心，亞視終於復活，另一批：唔係呀吖！大家各有意見，最緊要大家睇咗新節目先。」

更多娛聞，喺晒《娛果》
http://fb.com/appledailyent