【臨分手有嘢想爆？】收集失戀負能量 曾若華俾空間大家發洩
蘋果日報 2017/09/25 16:10
曾若華人間失格
攝影：黃曉妍
曾若華今日喺新城接受訪問，並宣傳新歌《人間失格》，佢指呢首歌係講分手前好嬲嘅感覺，幸好佢未遇過賤男，不過講到最嬲嗰次，曾若華話：「我哋半個月冇溝通，又未正式講分手，但有次我見到佢同女仔一齊，呢段時間真係好孤獨。」
佢又提到早前為新歌去英國拍MV：「我訂造咗一個霓虹燈箱，喺英國街頭拎住周圍走，代表住明知你係衰，但我仲未肯放手，我唔想分手住，但去到最後，我就打爛呢個霓虹燈箱，真係要放手。」
曾若華透露將會舉行3場迷你騷，呢3個騷係講分手嘅時候經歷3個階段，包括好憎前度、好憎自己同放手，佢話：「我成立咗Alone but not Lonely club，歡迎大家去留言，講你想同前度講嘅說話，或者分享前度做過對你唔住嘅事，畀大家有個發洩空間，我都聽咗好多，我會儲起呢啲訊息，再揀幾個出嚟，喺呢3個騷上分享。」
曾若華成立咗Alone but not Lonely club，畀大家有個發洩空間。
佢會將呢啲負能量喺音樂會分享。