人氣強勁嘅新蜘蛛俠湯姆賀倫（Tom Holland)，噚日專程去到巴塞隆拿為《蜘蛛俠：強勢回歸》（Spider-Man: Homecoming）造勢，喺記者會上仲大爆自己5歲就同細佬扮蜘蛛俠，真真正正係忠心fans!

湯姆連同導演鍾華斯(Jon Watts)、仲有緋聞女主角辛蒂亞(Zendaya)出席記者會，有記者問湯姆幾時開始鍾意蜘蛛俠，佢笑笑口咁話：「我5歲就已經喺屋企扮蜘蛛俠，仲會同細佬一齊玩。」到大個咗，估唔到真係有機會做！「當我知道電影公司為新蜘蛛俠試鏡，我直頭求經理人幫我報名。然後我足足試鏡試足5次！第一次佢話我係做主角嘅朋友，第二次就咁讀劇本，第三次就見到導演，直到第四次先見到羅拔唐尼（Robert Downey Jr.），第五次見埋美國隊長基斯伊雲斯（Chris Evans）同佢對戲。」過五關斬六將，湯姆終於成為到呢個超級英雄，真係唔簡單！

另外，「黑寡婦」施嘉莉祖安遜（Scarlett Johansson）近日受訪時透露《復仇者聯盟3》（Avengers：Infinity War）細節，佢爆現場有超過60個超英開工，其中一場甚至有32個角色一齊出現，根本分唔清邊個係超英，邊個係工作人員。