火箭由開季到依家只係輸咗七場波，同勇士一樣，係聯盟成績最好嘅其中一隊。不過，火箭其實有個問題，就係球隊今季輸嘅七場波，都係同明星控衛基斯保羅（Chris Paul）有關，就係火箭今季每次輸波，CP3唔係無份打，就係喺果場比賽受傷。唔通，火箭單係靠夏登（James Harden）就會搞唔掂？

火箭控衛CP3近日雖然已經開始輕微嘅練習，但就趕唔切喺禮拜一晚聖誕大戰鬥雷霆場波上陣。不過，就算無咗呢位星級控衛，火箭同主場雷霆喺上半場都互有領先，完半場OKC係咁易領先58:57。第三節兩隊有來有往，曾經十次交換領先位置。最後一節，火箭最多曾經領先過五分，但係最後半節嘅時間都係雷霆嘅天下，主隊喺最後七分鐘左右由安東尼（Carmelo Anthony）射入領先97:96之後，就再無落後過，期間火箭曾經兩次追到只係落後一分。

雷霆嘅羅伯臣（Andre Roberson）喺最後27秒封截咗夏登可以追平嘅三分波之後，韋斯卜克（Russell Westbrook）掟個波上前畀羅伯臣拎多兩分，OKC最終就係靠呢球贏112:107。韋少今場有31分、11助攻同6籃板，保羅佐治（Paul George）就有24分、5籃板同4助攻，至於安東尼就錄得20分、5籃板。火箭方面，夏登射入全隊最高嘅29分，另外有14助攻、8籃板，後衛E哥頓（Eric Gordon）、前鋒阿里沙（Trevor Ariza）分別射入20分，中鋒卡比拿（Clint Capela）都有19分、10籃板。

--------------------
BFB CHAMPIONS 2.0 聖誕新年活動連環出擊，登入即送傳奇球星「林伯特」！ http://bit.ly/2xrTKGM