韓國女團少女時代成員秀英今日下晝現身將軍澳，出席香港Colourmix舉行嘅代言活動，吸引近二百名粉絲到場支持。

活動原定喺下晝三點十五分開始，不過秀英就遲咗成半個鐘先現身，好在一班粉絲都冇發牢騷，仲仍然好熱情咁大叫歡樂，令秀英好開心。

以一條黃色橫間貼身裙現嘅秀英就用廣東話同大家打招呼，又用英文「ILoveHongKong」、「IMissYouGuys」等甜言嚟冧粉絲，親民到極。問到對香港粉絲印象如何時，秀英就話：「今次係我第一次自己嚟香港出活動，事前都好緊張，不過之前嚟香港開演唱會時都接觸過香港粉絲，個個都好熱情，所以亦都好似見朋友、屋企人一樣，好開心。」

另外，適逢下周二係秀英二十五歲生日，台下粉絲就即席唱咗英文版同韓文版嘅生日歌畀秀英聽，同佢提前慶生，而秀英亦都表現得好驚訝，仲向粉絲送上飛吻回報。

不過，成個問答環節連埋唱生日歌同影相，秀英只係喺台上逗留咗唔夠五分鐘就落咗台，令粉絲有少少唔夠喉囉。