百利保（617）唔單止係系內NAV折讓最大嘅股份，重秤潛力亦係最高，呢期郁郁貢，要昅實。
百利保最新NAV0.91元，現價（0.315元）相對折讓65.4%，同系富豪（078）折讓57.8%，世城（355）折讓55.5%，要搞世城系股份，博隻百利保。雖然富豪旗下豪宅富豪海灣回撥未盡，但百利保垂直揸住富豪，富豪有回撥，百利保一定受惠。
再講，百利保自家揸住鴨脷洲豪宅項目，應佔樓面27萬平方呎，加埋北京朝陽區大型房產發展項目部份權益（項目總樓面450萬平方呎），亦係世城系揸得最多大型項目嘅企業。計計數，百利保每股增值多0.2元，重秤後NAV去到1.1元，百利保實際折讓，係講緊71%，吸引到痹。博NAV收窄到50%，百利保要升74%到0.55元。除非牛市已去，否則，百利保極之抵博，仲唔係要昅實？

莊中博翻半番

莊士中國（298）最新NAV1.18元，現價（0.405元）相對折讓65.7%，有折讓打底之餘，今年4月，莊中伸手4供1，每股供0.4元，莊中現價已經跌到近呢個供股價。
再講，莊中市值5億銀，但咪睇佢細細粒，手頭土儲可建樓面高達2700萬平方呎，未來每方呎只係增值20蚊，已經等如莊中市值！可見莊中土儲晒士夠，增值潛力應該係斷倍數計。呢期莊中質穿0.4元，就兜底，擺中短線，博佢起碼翻半番。
錢雋