韓劇《三流之路》人氣急升嘅男星朴敘俊上月30號襲港舉行粉絲見面會，噚晚佢就轉戰到台灣嘅台大體育館開騷。

今次係朴敘俊首場台灣見面會，佢一出場又大晒台語話：「大家好」問候粉絲，又講中文：「我是朴敘俊，很高興見到你們。」即場同粉絲分享佢小時候嘅照片，更拋低男神包袱，自爆媽媽喺佢細個時經常為佢着絲襪，以前亦都冇諗過會好似今晚一樣喺咁多人面前講自己嘅故事，覺得好神奇。

朴敘俊自言本身同兩個弟弟感情好好，大細佬仲已經結婚生子，佢亦都好疼愛自己嘅侄子，主持人建議佢可以喺女粉絲堆中，為另一個未婚嘅細佬物色結婚對象，朴敘俊聽後哈哈大笑話：「冇諗到今日仲有咁樣嘅任務。」主持人仲抵死話如果粉絲做咗佢弟弟嘅老婆嘅話，估計對方會特別關心哥哥多啲。

而現時朴敘俊亦同粉絲玩遊戲，勝出粉絲仲可以畀佢從後抱抱同埋十指緊扣，認真羨慕死台下粉絲。同時佢又大晒廚藝，喺台灣一場特別炮製海鮮意大利粉，成功冧暈台迷。