【粒孫似爺爺】廚神都要放假 鼎爺出街食飯預祝父親節
演唱會HotchaWinkie李家鼎10周年WeCanCook
李家鼎、黎美言(Winkie)今晚喺尖沙嘴出席「We Can Cook謝師晚宴」,鼎爺最近要幫大台拍飲食節目,所以佢已經提早同家人食飯慶祝父親節:「出去食,自己煮太辛苦,孫仔一歲可以食魚,o依家見到孫仔都好冧。」收到乜禮物?鼎爺話:「未知,父親節仲有幾日至到,其實最緊要家人平安、身體健康,個孫快高長大、聰明伶俐。」
另外,Winkie話佢爸爸係廚師,所以佢都識得煮兩味:「女人識煮嘢食係加分位,希望將來嘅男朋友都識煮,家人識煮嘢食係family man,不過我o依家仲未搵到呢種男人。」
不過講講吓,Winkie就自爆最近桃花唔錯,好多人追,仲話唔知點揀好。咁多仔揀,唔知佢要咩條件呢?Winkie即刻:「照顧我、做一個好好嘅聆聽者、要有耐性、愛錫家庭。我要求好低。唔使有錢,我有收入,唔好咁高要求,真愛難求。」
至於Winkie個舊隊友張紋嘉(Crystal)提到Hotcha想搞入行10周年紀念演唱會(新聞連結: http://bit.ly/2s0Ds7w ),Winkie話:「其實我哋3個已經出過嚟開會,係想搞,搵緊投資者,我哋3個根本冇不和,有互相keep住聯絡。」但今年已經過咗一半喇喎?Winkie即刻話:「唔係,只要喺明年4月4日前,都係10周年。」
鼎爺話已經預祝父親節,佢話最緊要孫仔快高長大、聰明伶俐。
Winkie話有意搞Hotcha入行10周年演唱會
Winkie話呢個10周年紀念演唱會係搵緊投資者,亦證明佢哋3個根本冇不和。