應屆法甲冠軍摩納哥新星輩出，過去一季殺入歐聯4強技驚四座，今夏「被拆骨」似乎在所難免，葡萄牙中場貝拿度施華已經率先轉投曼城，仲有基利安麥巴比、泰莫爾巴卡約高、班捷文文迪等都係搶手貨。其實摩納哥未雨綢繆嘅工作做得唔錯，已經簽入泰利文斯、佐迪加斯柏同比拿利奧3位球員補充，而且你估淨係得豪門先可以挖走「妖人」？西班牙傳媒報道，摩納哥就以300萬歐元（約2,600萬港元）買斷巴塞隆拿U17西班牙國腳麥保拿（Jordi Mboula）嘅合約。

你冇睇錯，喺當今扭曲轉會生態下，300萬歐元買到「妖人」一名真係抵到爛，難怪唔少網民都讚摩納哥執到寶，巴塞就做咗超級大儍仔。咁麥保拿有幾勁？過去一季佢喺青年歐聯射入過兩記金球，其中16強對住多蒙特U19射入「一扭四」solo世界波，踢法靈活兼高速，下季喺摩納哥隨時大放異采！